In regionibus ubi sollemnitas Epiphania Domini celebratur dominica die 7 vel 8 ianuarii occurrente, Officium festi Baptismatis Domini celebratur feria II sequenti. Tempus per annum incipit feria III.

FERIA SECUNDA, Hebd. I

Ad Invitatorium

Dómine, lábia mea apéries.

Et os meum annuntiábit laudem tuam.

Ant. Præoccupémus fáciem Dómini in confessióne.

Ad Laudes matutinas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia).

Quæ omnia omittuntur, quando Invitatorium immediate præcedit.

HYMNUS

Splendor patérnæ glóriæ,

de luce lucem próferens,

lux lucis et fons lúminis,

diem dies illúminans,

Verúsque sol, illábere

micans nitóre pérpeti,

iubárque Sancti Spíritus

infúnde nostris sénsibus.

Votis vocémus et Patrem,

Patrem perénnis glóriæ,

Patrem poténtis grátiæ,

culpam reléget lúbricam.

Infórmet actus strénuos,

dentem retúndat ínvidi,

casus secúndet ásperos,

donet geréndi grátiam.

Mentem gubérnet et regat

casto, fidéli córpore;

fides calóre férveat,

fraudis venéna nésciat.

Christúsque nobis sit cibus,

potúsque noster sit fides;

læti bibámus sóbriam

ebrietátem Spíritus.

Lætus dies hic tránseat;

pudor sit ut dilúculum,

fides velut merídies,

crepúsculum mens nésciat.

Auróra cursus próvehit;

Auróra totus pródeat,

in Patre totus Fílius

et totus in Verbo Pater. Amen.

PSALMODIA

Ant. 1Ad te orábo, Dómine, mane exáudies vocem meam.

Tempore Paschali: Gloriabúntur in te omnes qui díligunt nomen tuum, allelúia.

Ant. 2Laudámus nomen tuum ínclitum, Deus noster.

Tempore Paschali: Tuum, Dómine, regnum, et tu es super omnes príncipes, allelúia.

Ant. 3Adoráte Dóminum in aula sancta eius.

Tempore Paschali: Sedébit Dóminus rex in ætérnum, allelúia.

Lectio brevis

2 Th 3, 10b-13

Si quis non vult operári, nec mandúcet. Audímus enim inter vos quosdam ambuláre inordináte, nihil operántes sed curióse agéntes; his autem, qui eiúsmodi sunt, præcípimus et obsecrámus in Dómino Iesu Christo, ut cum quiéte operántes suum panem mandúcent. Vos autem, fratres, nolíte defícere benefaciéntes.

Responsorium breve

Benedíctus Dóminus {*} A sǽculo et usque in sǽculum.

Benedíctus Dóminus {*} A sǽculo et usque in sǽculum.

Qui facit mirabília solus. {*}

A sǽculo et usque in sǽculum.

Glória Patri, et Fílio, et Spirítui Sancto.

Benedíctus Dóminus {*} A sǽculo et usque in sǽculum.

Ad Benedictus, ant. Benedíctus Dóminus Deus noster.

Preces

Christum magnificémus, plenum grátia et Spíritu Sancto, et fidénter eum implorémus:

Spíritum tuum da nobis, Dómine.

Concéde nobis diem istum iucúndum, pacíficum et sine mácula,

ut, ad vésperam perdúcti, cum gáudio et mundo corde te collaudáre valeámus.

Spíritum tuum da nobis, Dómine.

Sit hódie splendor tuus super nos,

et opus mánuum nostrárum dírige.

Spíritum tuum da nobis, Dómine.

Osténde fáciem tuam super nos ad bonum in pace,

ut hódie manu tua válida contegámur.

Spíritum tuum da nobis, Dómine.

Réspice propítius omnes, qui oratiónibus nostris confídunt,

eos adímple bonis ánimæ et córporis univérsis.

Spíritum tuum da nobis, Dómine.

Pater noster.

Oratio

Actiónes nostras, quǽsumus, Dómine, aspirándo prǽveni et adiuvándo proséquere, ut cuncta nostra operátio a te semper incípiat, et per te cœpta finiátur.

Conclusio Horæ, ut in Ordinario.

Ad Horam mediam

PSALMODIA

Ant. 1 Lex Dómini lætíficat corda et illúminat óculos.

Ant. 2 Exsúrget Dóminus iudicáre pópulos in iustítia.

Ant. 3 Deus iudex iustus et fortis, qui salvos facit rectos corde.

Ad Tertiam

Lectio brevis

Rom 13, 8. 10

Némini quidquam debeátis, nisi ut ínvicem diligátis: qui enim díligit próximum, legem implévit. Diléctio próximo malum non operátur; plenitúdo ergo legis est diléctio.

Adiútor meus esto, ne me reícias.

Neque derelínquas me, Deus salútis meæ.

Oratio

Deus, Pater óptime, qui labórem homínibus ita dedísti, ut mútua semper arte ad altióra profícerent, præsta, quǽsumus, sic nos iúgiter operári, ut filiórum in te spíritu et fratérna in omnes caritáte vivámus.

Ad Sextam

Lectio brevis

Iac 1, 19b-20. 26

Sit omnis homo velox ad audiéndum, tardus autem ad loquéndum et tardus ad iram; ira enim viri iustítiam Dei non operátur. Si quis putat se religiósum esse non freno circumdúcens linguam suam sed sedúcens cor suum, huius vana est relígio.

Benedícam Dóminum in omni témpore.

Semper laus eius in ore meo.

Oratio

Deus, qui messis ac víneæ dóminus es et custos, quique offícia tríbuis et iusta stipéndia meritórum, fac nos diéi pondus ita portáre, ut nihil umquam de tuis plácitis conquerámur.

Ad Nonam

Lectio brevis

1 Petr 1, 17b. 18a. 19

In timóre incolátus vestri témpore conversámini, sciéntes quod non corruptibílibus argénto vel auro redémpti estis, sed pretióso sánguine quasi Agni incontamináti et immaculáti Christi.

Rédime me, Dómine, et miserére mei.

In ecclésiis benedícam Dómino.

Oratio

Deus, qui nos ádvocas illa hora, qua ad templum ascendébant Apóstoli, præsta, ut orátio, quam in nómine Iesu sincéra tibi mente persólvimus, ómnibus nomen illud invocántibus salútem eius váleat impetráre.

Ad Vesperas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia).

HYMNUS

Imménse cæli cónditor,

qui, mixta ne confúnderent,

aquæ fluénta dívidens,

cælum dedísti límitem,

Firmans locum cæléstibus

simúlque terræ rívulis,

ut unda flammas témperet,

terræ solum ne díssipet:

Infúnde nunc, piíssime,

donum perénnis grátiæ,

fraudis novæ ne cásibus

nos error átterat vetus.

Lucem fides invéniat,

sic lúminis iubar ferat;

hæc vana cuncta térreat,

hanc falsa nulla cómprimant.

Præsta, Pater piíssime,

Patríque compar Unice,

cum Spíritu Paráclito

regnans per omne sǽculum. Amen.

PSALMODIA

Ant. 1Oculi Dómini in páuperem respíciunt.

Tempore Paschali: Confídite, ego vici mundum, allelúia.

Ant. 2Beáti mundo corde, quóniam ipsi Deum vidébunt.

Tempore Paschali: Habitábit in tabernáculo tuo, requiéscet in monte sancto tuo, allelúia.

Ant. 3In Fílio suo elégit nos Deus in adoptiónem filiórum.

Tempore Paschali: Ego, si exaltátus fúero a terra, ómnia traham ad meípsum, allelúia.

Lectio brevis

Col 1, 9b-11

Impleámini agnitióne voluntátis eius in omni sapiéntia et intelléctu spiritáli, ut ambulétis digne Dómino per ómnia placéntes, in omni ópere bono fructificántes et crescéntes in sciéntia Dei, in omni virtúte confortáti secúndum poténtiam claritátis eius in omnem patiéntiam et longanimitátem, cum gáudio.

Responsorium breve

Sana ánimam meam, {*} Quia peccávi tibi.

Sana ánimam meam, {*} Quia peccávi tibi.

Ego dixi: Dómine, miserére mei. {*}

Quia peccávi tibi.

Glória Patri, et Fílio, et Spirítui Sancto.

Sana ánimam meam, {*} Quia peccávi tibi.

Ad Magnificat, ant. Magníficat ánima mea Dóminum, quia respéxit Deus humilitátem meam.

Preces

Deus cum pópulo suo pactum íniit sempitérnum, neque désinit illi benefácere. Ideo ei grátias agámus et fidénti ánimo nostram ad eum dirigámus oratiónem:

Bénefac pópulo tuo, Dómine.

Salvum fac pópulum tuum, Dómine,

et bénedic hereditáti tuæ.

Bénefac pópulo tuo, Dómine.

Cóngrega in unum christiáno nómine decorátos,

ut credat mundus in Christum, quem misísti.

Bénefac pópulo tuo, Dómine.

Grátiam tuam ómnibus amícis nostris confer et notis,

bonúmque Christi odórem fac ut ipsi diffúndant.

Bénefac pópulo tuo, Dómine.

Amórem tuum agonizántibus manifésta,

da ut salútem tuam eórum óculi vídeant.

Bénefac pópulo tuo, Dómine.

Erga defúnctos misericórditer age,

ággrega eos quiescéntibus in Christo.

Bénefac pópulo tuo, Dómine.

Pater noster.

Oratio

Magníficet te, Dómine, hæc nostræ servitútis proféssio, ut qui propter nostram salútem humilitátem Maríæ Vírginis respexísti, ad plenitúdinem redemptiónis nos fácias exaltári.

Conclusio Horæ, ut in Ordinario.