Hebd. II Psalterii

DOMINICA

Ad I Vesperas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia.)

HYMNUS

Rerum, Deus, fons ómnium,

qui, rebus actis ómnibus,

totíus orbis ámbitum

censu replésti múnerum,

Ac, mole tanta cóndita,

tandem quiétem díceris

sumpsísse, dans labóribus

ut nos levémur grátius:

Concéde nunc mortálibus

deflére vita crímina,

instáre iam virtútibus

et munerári prósperis,

Ut cum treméndi iúdicis

horror suprémus cœ́perit,

lætémur omnes ínvicem

pacis repléti múnere.

Præsta, Pater piíssime,

Patríque compar Unice,

cum Spíritu Paráclito

regnans per omne sǽculum. Amen.

PSALMODIA

Ant. 1Lucérna pédibus meis verbum tuum, Dómine, allelúia.

Ant. 2Adimplébis me lætítia cum vultu tuo, Dómine, allelúia.

Ant. 3In nómine Iesu omne genu flectátur in cælo et in terra, allelúia.

Lectio brevis

Col 1, 2b-6a

Grátia vobis et pax a Deo Patre nostro. Grátias ágimus Deo Patri Dómini nostri Iesu Christi semper pro vobis orántes, audiéntes fidem vestram in Christo Iesu et dilectiónem, quam habétis in sanctos omnes, propter spem, quæ repósita est vobis in cælis, quam ante audístis in verbo veritátis evangélii, quod pervénit ad vos, sicut et in univérso mundo est fructíficans et crescens sicut et in vobis.

Responsorium breve

A solis ortu usque ad occásum, {*} Laudábile nomen Dómini.

A solis ortu usque ad occásum, {*} Laudábile nomen Dómini.

Super cælos glória eius. {*}

Laudábile nomen Dómini.

Glória Patri, et Fílio, et Spirítui Sancto.

A solis ortu usque ad occásum, {*} Laudábile nomen Dómini.

Ad Magnificat, antiphona ut in Proprio de Tempore.

Preces

Deus plebem, quam elégit in hereditátem suam, ádiuvat et tuétur, ut sit beáta. Ei grátias agámus et pietátis eius mémores clamémus:

In te, Dómine, confídimus.

Orámus te, Pater clementíssime, pro Papa nostro N. et Epíscopo nostro N.,

prótege illos et tua virtúte sanctífica.

In te, Dómine, confídimus.

Infírmi se Christi sócios passiónum séntiant

et consolatiónis eius semper partícipes.

In te, Dómine, confídimus.

Réspice in tua pietáte tecto caréntes,

ut locum dignæ habitatiónis váleant inveníre.

In te, Dómine, confídimus.

Fructus terræ dare et conserváre dignéris,

ut panem omnes cotidiánum repériant.

In te, Dómine, confídimus.

(Vel:
Gentem nostram a malo defénde propítius,

ut tua pace et prosperitáte fruátur.)

In te, Dómine, confídimus.

Tu, Dómine, magna defúnctos pietáte proséquere,

mansiónem eis concéde cæléstem.

In te, Dómine, confídimus.

Pater noster.

Oratio, ut in Proprio de Tempore.

Conclusio Horæ, ut in Ordinario.

Ad Invitatorium

Dómine, lábia mea apéries.

Et os meum annuntiábit laudem tuam.

Ant. Pópulus Dómini et oves páscuæ eius, veníte, adorémus eum, allelúia.

Ad Laudes matutinas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia.)

Quæ omnia omittuntur, quando Invitatorium immediate præcedit.

HYMNUS

Ecce iam noctis tenuátur umbra,

lucis auróra rútilans corúscat;

nísibus totis rogitémus omnes

cunctipoténtem,

Ut Deus, nostri miserátus, omnem

pellat angórem, tríbuat salútem,

donet et nobis pietáte patris

regna polórum.

Præstet hoc nobis Déitas beáta

Patris ac Nati, paritérque Sancti

Spíritus, cuius résonat per omnem

glória mundum. Amen.

PSALMODIA

Ant. 1Benedíctus qui venit in nómine Dómini, allelúia.

Ant. 2Hymnum dicámus Deo nostro, allelúia.

Ant. 3Laudáte Dóminum secúndum multitúdinem magnitúdinis eius, allelúia.

Lectio brevis

Ez 36, 25-27

Effúndam super vos aquam mundam, et mundabímini ab ómnibus inquinaméntis vestris, et ab univérsis idólis vestris mundábo vos. Et dabo vobis cor novum et spíritum novum ponam in médio vestri et áuferam cor lapídeum de carne vestra et dabo vobis cor cárneum; et spíritum meum ponam in médio vestri et fáciam, ut in præcéptis meis ambulétis et iudícia mea custodiátis et operémini.

Responsorium breve

Confitébimur tibi, Deus, {*} Et invocábimus nomen tuum.

Confitébimur tibi, Deus, {*} Et invocábimus nomen tuum.

Narrábimus mirabília tua. {*}

Et invocábimus nomen tuum.

Glória Patri, et Fílio, et Spirítui Sancto.

Confitébimur tibi, Deus, {*} Et invocábimus nomen tuum.

Ad Benedictus, antiphona ut in Proprio de Tempore.

Preces

Salvatóri nostro grátias agámus, qui in hunc mundum descéndit ut esset Deus nobíscum. Eum invocémus clamántes:

Christe, Rex glóriæ, sis lux et gáudium nostrum.

Christe Dómine, lux óriens ex alto, primítiæ resurrectiónis futúræ,

da nos te sequi, ne in umbra mortis sedeámus, sed ut in lúmine vitæ ambulémus.

Christe, Rex glóriæ, sis lux et gáudium nostrum.

Bonitátem tuam in ómnibus creatúris diffúsam nobis osténde,

ut tuam ubíque glóriam contemplémur.

Christe, Rex glóriæ, sis lux et gáudium nostrum.

Ne patiáris, Dómine, hódie malo nos vinci,

sed fac ut in bono nos vincámus malum.

Christe, Rex glóriæ, sis lux et gáudium nostrum.

Qui in Iordáne baptizátus, a Sancto Spíritu es inúnctus,

da nos hódie grátia agi Sancti Spíritus tui.

Christe, Rex glóriæ, sis lux et gáudium nostrum.

Pater noster.

Oratio, ut in Proprio de Tempore.

Conclusio Horæ, ut in Ordinario.

PSALMODIA

Ant. 1 In páscuis viréntibus Dóminus me collocávit, allelúia.

Ant. 2 In Israel magnum nomen Dómini, allelúia.

Ant. 3 Terra trémuit et quiévit, cum exsúrgeret in iudícium Deus, allelúia.

Lectio brevis

Rom 5, 1-2. 5

Iustificáti ex fide, pacem habémus ad Deum per Dóminum nostrum Iesum Christum, per quem et accéssum habémus fide in grátiam istam, in qua stamus et gloriámur in spe glóriæ Dei. Spes autem non confúndit, quia cáritas Dei diffúsa est in córdibus nostris per Spíritum Sanctum, qui datus est nobis.

Misericórdias Dómini in ætérnum cantábo.

In generatiónem et generatiónem annuntiábo veritátem tuam.

Lectio brevis

Rom 8, 26

Spíritus ádiuvat infirmitátem nostram; nam quid orémus, sicut opórtet, nescímus, sed ipse Spíritus interpéllat gemítibus inenarrabílibus.

Appropínquet deprecátio mea in conspéctu tuo, Dómine.

Iuxta verbum tuum da mihi intelléctum.

Lectio brevis

2 Cor 1, 21-22

Confírmat nos vobíscum in Christum et unxit nos Deus, et signávit nos et dedit arrabónem Spíritus in córdibus nostris.

Dóminus illuminátio mea et salus mea.

Dóminus protéctor vitæ meæ.

Ad II Vesperas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia.)

HYMNUS

O lux, beáta Trínitas

et principális Unitas,

iam sol recédit ígneus:

infúnde lumen córdibus.

Te mane laudum cármine,

te deprecémur véspere;

te nostra supplex glória

per cuncta laudet sǽcula.

Christum rogámus et Patrem,

Christi Patrísque Spíritum;

unum potens per ómnia,

fove precántes, Trínitas. Amen.

PSALMODIA

Ant. 1Sacérdos in ætérnum Christus Dóminus secúndum órdinem Melchísedech, allelúia.

Ant. 2Deus noster in cælo; ómnia quæcúmque vóluit, fecit, allelúia.

Ant. 3Laudem dícite Deo, omnes servi eius, pusílli et magni, allelúia.

Lectio brevis

2 Th 2, 13-14

Debémus grátias ágere Deo semper pro vobis, fratres, dilécti a Dómino, quod elégerit vos Deus primítias in salútem in sanctificatióne Spíritus et fide veritátis, ad quod et vocávit vos per evangélium nostrum in acquisitiónem glóriæ Dómini nostri Iesu Christi.

Responsorium breve

Magnus Dóminus noster, {*} Et magna virtus eius.

Magnus Dóminus noster, {*} Et magna virtus eius.

Et sapiéntiæ eius non est númerus. {*}

Et magna virtus eius.

Glória Patri, et Fílio, et Spirítui Sancto.

Magnus Dóminus noster, {*} Et magna virtus eius.

Ad Magnificat, antiphona ut in Proprio de Tempore.

Preces

Laus et honor Christo, qui salváre in perpétuum potest accedéntes per semetípsum ad Deum, semper vivens ad interpellándum pro nobis. Qua fide suffúlti eum implorémus:

Meménto pópuli tui, Dómine.

Iam declinánte die, Sol iustítiæ, te super cunctum genus humánum invocámus,

ut luce tua, numquam decidénte, omnes sine fine fruántur.

Meménto pópuli tui, Dómine.

Custódi testaméntum, quod sánguine divíno sanxísti,

et sanctífica Ecclésiam tuam, ut sit immaculáta.

Meménto pópuli tui, Dómine.

Meménto, Dómine, congregatiónis tuæ,

loci habitatiónis tuæ.

Meménto pópuli tui, Dómine.

In viam pacis et prosperitátis dírige iter faciéntes,

ut cum salúte et gáudio ad optáta loca pervéniant.

Meménto pópuli tui, Dómine.

Animas, Dómine, súscipe defunctórum,

véniam tuam eis concéde et glóriam sempitérnam.

Meménto pópuli tui, Dómine.

Pater noster.

Oratio, ut in Proprio de Tempore.

Conclusio Horæ, ut in Ordinario.